ახალი ამბები

ბათუმის შოთა რუსთაველის სახელმწიფო უნივერსიტეტს საქართველოს პარლამენტის განათლებისა და მეცნიერების კომიტეტის თავმჯდომარე გივი მიქანაძე ეწვია. ბსუ-ს რექტორთან მერაბ ხალვაშთან, ადმინისტრაციის ხელმძღვანელთან მერაბ დიასამიძესთან, პროფესორ-მასწავლებლებთან და მკვლევრებთან გამართულ შეხვედრაზე გივი მიქანაძემ განათლებისა და მეცნიერების კომიტეტის ინიციატივით მიმდინარე თემატური მოკვლევა წარმოადგინა საკითხზე - საქართველოს რეგიონებში მდებარე საჯარო უმაღლესი საგანმანათლებლო დაწესებულებების წინაშე არსებული გამოწვევების განსაზღვრა და მხარდამჭერი მექანიზმების შემუშავება.

ბათუმის შოთა რუსთაველის სახელმწიფო უნივერსიტეტში კურსდამთავრებულთა გამოშვების 86-ე საზეიმო ღონისძიება გაიმართა. მანტიებში გამოწყობილ კურსდამთავრებულებს უნივერსიტეტის რექტორმა, პროფესორმა მერაბ ხალვაშმა, აჭარის ა.რ. განათლების, კულტურისა და სპორტის მინისტრმა მაია ხაჯიშვილმა, აჭარის ა.რ. უმაღლესი საბჭოს განათლების, მეცნიერების, კულტურისა და სპორტის საკითხთა კომიტეტის თავმჯდომარემ დავით ბაციკაძემ და ფაკულტეტების დეკანებმა სწავლის დასრულება მიულოცეს, წარმატებები უსურვეს და სერტიფიკატები გადასცეს.

„ერაზმუს+“-ის პროექტის „ინოვაციები კურიკულუმში სოციალური ჩართულობის მხარდასაჭერად“ ფარგლებში, ბათუმის შოთა რუსთველის სახელმწიფო უნივერსიტეტში საინფორმაციო შეხვედრა გაიმართა ადგილობრივი თვითმმართველობისა და სამოქალაქო საზოგადოების წარმომადგენლებთან. შეხვედრის მიზანია, გაზარდოს დამსწრე საზოგადოების ცნობიერება საგანმანათლებლო სისტემაში მრავალფეროვანი ჯგუფების წარმომადგენელი სტუდენეტების, აკადემიური და ადმინისტრაციული პერსონალის ჩართულობისა და თანამონაწილეობისთვის თანასწორი პირობების შექმნის მნიშვნელობაზე. მრავალმხრივი მიდგომა ითვალისწინებს ინკლუზიური განათლების პრაქტიკის დანერგვას, განვითარებასა და გათვალისწინებას უმაღლესი განათლების ყველა ეტაპზე, როგორც ფორმალურ განათლებაში, ისე ექსტრაკურიკულურ აქტივობებში.

ბათუმის შოთა რუსთაველის სახელმწიფო უნივერსიტეტში სტუდენტური თეატრის სპექტაკლის „ამიკო" პრემიერა გაიმართა. სპექტაკლი ცნობილი დრამატურგის ოთარ ბაღათურიას პიესის მიხედვით რეჟისორმა გიორგი ფირცხალაიშვილმა დადგა. კომედიური ჟანრის ერთმოქმედებიან სპექტაკლში ბსუ-ს სხვადასხვა სპეციალობის სტუდენტები: გიორგი ბოლქვაძე, მელანია ჩხაიძე, მარსი ნემსაძე, ტარიელ კიკვაძე, ბაჩი ფარტენაძე, თორნიკე პაიჭაძე, ლიზა ტაკიძე და ვიკა მჟავანაძე მონაწილეობდნენ. წარმოდგენის მხატვრობა - ანი არძენაძეს, ხოლო მუსიკალური გაფორმება ტარიელ კიკვაძეს ეკუთვნის.

ბსუ-ს 3-7 ივლისს, „ერაზმუს+“-ის ადმინისტრაციული პერსონალის გაცვლითი პროგრამის ფარგლებში ბიალისტოკის უნივერსიტეტის რექტორის მოადგილე, პროფესორი იაროსლავ მატვიეიუკი, რექტორის აპარატის უფროსი, პროფესორი აგნიეშკა ბუიაკოვსკა და ბუნების ცენტრის დირექტორი, დოქტორი ანა მატვიეიუკი ეწვივნენ. ვიზიტის ფარგლებში, დელეგაციის წევრები შეხვდნენ რექტორის მოადგილეს, პროფესორ თამარ სირაძესა და ბსუ-ს სტრატეგიული განვითარებისა და საგარეო ურთიერთობათა დეპარტამენტის წარმომადგენლებს, ეკონომიკისა და ბიზნესის ფაკულტეტის დეკანს, პროფესორ ნათელა წიკლაშვილს, საბუნებისმეტყველო მეცნიერებათა და ჯანდაცვის ფაკულტეტის დეკანს, პროფესორ რუსუდან ხუხუნაიშვილს და იურიდიული და სოციალურ მეცნიერებათა ფაკულტეტის დეკანს, პროფესორ ლევან ჯაყელსა და ფაკულტეტის პროფესორ- მასწავლებლებს. შეხვედრაზე მხარეებმა ერთობლივი საგანმანათლებლო პროექტების, საერთაშორისო პროგრამების განხორციელებასა და სამომავლო თანამშრომლობის გეგმებზე ისაუბრეს.