ახალი ამბები

აჭარის მთავრობის თავმჯდომარე ლევან ვარშალომიძე, შოთა რუსთაველის სახელმწიფო უნივერსიტეტის რექტორი, პროფესორი ალიოშა ბაკურიძე და ადმინისტრაციის ხელმძღვანელი დავით ლეკვეიშვილი რსუ-ს სამეცნიერო ცენტრის მეცნიერ-თანამშრომლებს შეხვდნენ და სამეცნიერო ცენტრის ხელმძღვანელი ემზარ ძირკვაძე წარუდგინეს. მკვლევრები შეხვედრაზე დაგეგმილ სიახლეებსა და სამეცნიერო მიმართულებების პრიორიტეტებსაც გაეცნენ. სამეცნიერო-კვლევითი ინსტიტუტების რეორგანიზაციის შედეგად ჩამოყალიბებული შოთა რუსთაველის სახელმწიფო უნივერსიტეტის სამეცნიერო ცენტრი ქობულეთში, ფიტო-პათოლოგიის მიმართულების შენობაში განთავსდება. აჭარის მთავრობის გადაწყვეტილებით გამოიყო თანხა, რომელიც სამეცნიერო ცენტრის ინფრასტრუქტურის განვითარებას, მატერიალურ-ტექნიკური ბაზის სრულყოფასა და სამეცნიერო კვლევა-ძიების მასშტაბების გაზრდას მოხმარდება.

ფერარას (იტალია) უნივერსიტეტის პროფესორი, რომაული კვლევის ცენტრის ხელმძღვანელი ლივიო ზერბინი და თბილისის ივანე ჯავახიშვილის სახელობის სახელმწიფო უნივერსიტეტის საპატიო დოქტორი კლაუდიო დე ბიაზი შოთა რუსთაველის სახელმწიფო უნივერსიტეტს ეწვივნენ. რომაული ძეგლებით დაინტერესებული იტალიელი სტუმრები გონიო-აფსაროსის ციხისა და სხვა ისტორიულ-კულტურული ღირსშესანიშნაობების შესწავლას გეგმავენ. რსუ-ს რექტორთან, პროფესორ ალიოშა ბაკურიძესთან გამართულ შეხვედრაზე მკვლევრებმა უმაღლეს სასწავლებლებს შორის თანამშრომლობის პირობებზე, გაცვლით პროგრამებზე, ერთობლივი არქეოლოგიური გათხრების, სამეცნიერო კონფერენციების, სიმპოზიუმების ჩატარებასა და წარმოებული კვლევა-ძიების შედეგების პოპულარიზაციის აუცილებლობაზე ისაუბრეს.

იენის ფრიდრიხ შილერის სახელობის უნივერსიტეტის ეკონომიკის ფაკულტეტის დეკანი, რულანდ იოჰანესი და თბილისის ივანე ჯავახიშვილის სახელობის სახელმწიფო უნივერსიტეტის ეკონომიკისა და ბიზნესის ფაკულტეტის დეკანი ელენე ხარაბაძე შოთა რუსთაველის სახელმწიფო უნივერსიტეტის რექტორს, პროფესორ ალიოშა ბაკურიძეს შეხვდნენ. მხარეები სამართალმცოდნეობისა და ეკონომიკის მიმართულებით ერთობლივი სადოქტორო პროგრამების განხორცილებაზე შეთანხმდნენ. შეხვედრაზე ასევე დაიგეგმა ტურიზმის მენეჯმენტის ერთობლივი საბაკალავრო პროგრამის ამოქმედება.

შოთა რუსთაველის სახელმწიფო უნივერსიტეტის, საქართველოს მათემატიკოსთა კავშირის, საქართველოს ტექნიკური უნივერსიტეტისა და ნ. მუსხელიშვილის სახელობის გამოთვლითი მათემატიკის ინსტიტუტის ორგანიზებით რსუ-ში მათემატიკოსთა II საერთაშორისო კონფერენცია გაიხსნა. ხუთდღიან სამეცნიერო ფორუმზე მსოფლიოს 19 ქვეყნის 231 მათემატიკოსი დარგის თანამედროვე მიღწევებსა და სამეცნიერო კვლევის შედეგებს წარმოადგენენ. სამეცნიერო კონფერენცია ცხრა სექციად იმუშავებს და გამოყენებითი და თეორიული მათემატიკის შემდეგ მიმართულებებს მოიცავს: მათემატიკური ლოგიკა, გამოყენებითი ლოგიკა და პროგრამირება; ტოპოლოგია, ალგებრა და რიცხვთა თეორია; ნამდვილი და კომპლექსური ანალიზი; ჩვეულებრივი და კერძოწარმოებულიანი დიფერენციალური განტოლებები და მათი გამოყენება; ალბათობის თეორია და სტატისტიკა, ფინანსური მათემატიკა; მათემატიკური მოდელირება და რიცხვითი ანალიზი; უწყვეტ გარემოთა მექანიკა; მათემატიკური ფიზიკა.

ევროკომისიის TEMPUS-ის პროგრამის ხელშეწყობით შოთა რუსთაველის სახელმწიფო უნივერსიტეტში საერთაშორისო კონფერენცია ჩატარდა თემაზე: „სოციალური სამუშაოს განათლებისა და პროფესიის განვითარება აღმოსავლეთ ევროპაში“. კონფერენციაში ქართველებთან ერთად ბრიტანელი, სლოვენიელი, ლიტველი, ლატვიელი და უკრაინელი წამყვანი სპეციალისტები მონაწილეობდნენ. მეორე წელია რსუ ჩართულია სოციალური მუშაობის აკადემიური განვითარების პროგრამაში, რომლის ფარგლებში უმაღლესი სასწავლებელის 8 პროფესორ-მასწავლებელმა გადამზადება გაიარა. შოთა რუსთაველის სახელმწიფო უნივერსიტეტში სოციალური სამუშაოს სამსემესტრიანი სერტიფიცირებული კურსები ხორციელდება, უახლოეს მომავალში კი სოციალური სამუშაოს საბაკალავრო პროგრამა ამოქმედდება.