ახალი ამბები

მართლმადიდებლური ფილმების საერთაშორისო ფესტივალის „წმინდა ანდრიას ჯვარის“ ფარგლებში, შოთა რუსთაველის სახელმწიფო უნივერსიტეტში მრგვალი მაგიდა - ,,ეკლესია და კინემატოგრაფია“ გაიმართა. „წმინდა ანდრიას ჯვარის“ ორგანიზატორებმა, რეჟისორებმა, დრამატურგებმა, სცენარისტებმა და სასულიერო პირებმა ფესტივალზე წარმოდგენილი დოკუმენტური, მხატვრული, ანიმაციური, სტუდენტური ფილმები და ტელეგადაცემები შეაფასეს. მართლმადიდებლური ფილმების საერთაშორისო ფესტივალი საქართველოს კათოლიკოს–პატრიარქის, უწმინდესისა და უნეტარესის, ილია მეორის ლოცვა–კურთხევითა და პატრონაჟით ტარდება და მასში 5 ქვეყნის 35 ფილმი მონაწილეობს.

შოთა რუსთაველის დარბაზში აზერბაიჯანის რესპუბლიკის სახელმწიფოებრივი დამოუკიდებლობის ადღგენის 20 წლისადმი მიძღვნილი საიუბილეო შეხვედრა გაიმართა. აზერბაიჯანის რესპუბლიკის გენერალურმა კონსულმა ქალაქ ბათუმში, დოქტორმა ჰუსეინ ნაჯაფოვმა და აისელ ნაჯაფოვამ მთავრობის წევრებისათვის, დიპლომატიური კორპუსის წარმომადგენლებისათვის, სტუდენტებისა და პროფესორ-მასწავლებლებისათვის მოხსენებები წაიკითხეს ქვეყნის ისტორიაზე, დღევანდელობასა და მიღწევებზე. დიპლომატმა ხაზი გაუსვა საქართველოსთან არსებული კეთილმეზობლური ურთიერთობებისა და ერთობლივი ეკონომიკური, საგანმანათლებლო და კულტურული პროექტების განხორციელების მნიშვნელობას. დაიგეგმა შოთა რუსათველის სახელმწიფო უნივერსიტეტს, ბაქოს სახელმწიფო უნივერსიტეტსა და ბაქოს სამედიცინო უნივერსიტეტს შორის თანამშრომლობის მემორანდუმის გაფორმება. რსუ-ს საერთაშორისო ურთიერთობების სპეციალობის ხუთი სტუდენტი სტაჟირებას გაივლის აზერბაიჯანის რესპუბლიკის გენერალურ საკონსულოში ქალაქ ბათუმში.

ევროპის იურისტ სტუდენტთა ასოციაციის (ELSA) წარმომადგენლები შოთა რუსთაველის სახელმწიფო უნივერსიტეტის სოციალურ მეცნიერებათა, ბიზნესისა და სამართალმცოდნეობის ფაკულტეტის სტუდენტებს შეხვდნენ და ორგანიზაციის საქმიანობა და სამომავლო გეგმები გააცნეს. პრეზენტაციაზე რეგიონში ორგანიზაციის წარმომადგენლობის დაფუძნება და ერთობლივი პროექტების განხორციელება დაიგეგმა. 2012 წელს, ასოციაციის საერთაშორისო საბჭოს შეხვედრას ბათუმი უმასპინძლებს, რომელშიც ევროპის 42 ქვეყნის 400-მდე წარმომადგენელი მიიღებს მონაწილეობას. ELSA-ს მიზანია ხელი შეუწყოს მაღალკვალიფიციური განათლებისათვის საჭირო ევროპული სტანდარტების დანერგვასა და სასწავლო-სამეცნიერო პროგრამების ამოქმედებას.

არიზონას სახელმწიფო უნივერსიტეტის პროფესორმა რობერტ მელნიკმა საჯარო ლექცია წაიკითხა თემაზე: ,,მსოფლიოს მდგრადი განვითარების გამოწვევები: საჯარო პოლიტიკის ფუნქცია საქართველოში“. ლექციას შოთა რუსთაველის სახელმწიფო უნივერსიტეტის სტუდენტები, პროფესორ-მასწავლებლები, მკვლევრები და არასამათავრობო ორგანიზაციის წარმომადგენლები ესწრებოდნენ. მდგრადი განვითარების ექსპერტი უნივერსიტეტს აღმოსავლეთ-დასვლეთის მართვის ინსტიტუტისა და ამერიკის შეერთებული შტატების საერთაშორისო სააგენტო "USAID"-ის მხარდაჭერით ეწვია.

უნივერსიტეტის ეზოში სტუდენტური თვითმმართველობის ინიციატივით იტალიელი კომედიოგრაფის კარლო გოლდონის ,,სასეირო ოინის“ ჩვენება გაიმართა. რეჟისორ ოთარ ქათამაძის სპექტაკლში პროფესიონალ მსახიობებთან ერთად სხვადასხვა ფაკულტეტის სტუდენტებიც მონაწილეობდნენ. ,,Comedia del arte”-ს სტილში დადგმული წარმოდგენა ქალაქ ბათუმის მერიის ახალგაზრდობის საქმეთა მუნიციპალური პროგრამის ფარგლებში შედგა, რომლის მიზანია ნიჭიერი, შემოქმედებითი უნარის მქონე ახალგაზრდების მხარდაჭერა და მათი წარმოჩენა. ,,ზაფხულის ღია ახალგაზრდულმა თეატრმა“ რამდენიმე თვის განმავლობაში ქალაქის ბულვარსა და ქუჩებში არაერთი სპექტაკლი დადგა.