ახალი ამბები

რსუ-ს თარგმანის კვლევებისა და ინტერდისციპლინარული კვლევების საკოორდინაციო საბჭოს სესია ჩატარდა. საკოორდინაციო საბჭოსა და საგრანტო ჯგუფის წევრებმა პროექტი „მულტილინგვური კორპუსი - პოლიტიკა, როგორც მულტიდისციპლინარული კორპუსი“ წარმოადგინეს, რომელიც EWMI – USAID-ის საუნივერსიტეტო მხარდაჭერის გრანტის ფარგლებში ხორციელდება. შეხვედრაზე პროექტის მონაწილეებმა ინგლისურ-ქართული კორპუსის შექმნისა და კორპუსული კვლევების დანერგვის საკითხებზე იმსჯელეს. ასევე წარმოადგინეს გრანტის მართვის ტექნიკური და ლინგვისტური ასპექტების ანალიზი და სტრატეგიული საკითხები განიხილეს. შოთა რუსთაველის სახელმწიფო უნივერსიტეტის თარგმანის კვლევებისა და ინტერდისციპლინარული კვლევების საკოორდინაციო საბჭო 2011 წლიდან ქართული ენის ეროვნული კორპუსის საკოორდინაციო საბჭოს წევრია.

შოთა რუსთაველის სახელმწიფო უნივერსიტეტის სტუდენტებმა ბათუმის საჯარო და კერძო სკოლის დამამთავრებელი კლასის მოსწავლეებისა და აბიტურიენტებისათვის საახალწლო კონცერტი გამართეს. უმაღლესი სასწავლებლის კურსდამთავრებულებმა ახალგაზრდებს რსუ-ს საგანმანათლებლო პროგრამები, საუნივერსიტეტო ცხოვრება გააცნეს და საინფორმაციო ბუკლეტები დაურიგეს. კონცერტი სტუდენტთა მომსახურებისა და მხარდაჭერის სამსახურის ორგანიზებით ჩატარდა და მასში უნივერსიტეტის სტუდენტთა შემოქმედებითი, ქორეოგრაფიული და ვოკალური ანსამბლები მონაწილეობდა.

ბათუმის, ხულოს, შუახევის, ქედის, ხელვაჩაურის, ქობულეთის, ლანჩხუთის, ოზურგეთის, ჩოხატაურის კერძო და საჯარო სკოლების მეთორმეტე კლასის მოსწავლეებისათვის შოთა რუსთაველის სახელმწიფო უნივერსიტეტის დეკანებმა, პროფესორ-მასწავლებლებმა და სტუდენტებმა ღია კარის დღე ჩაატარეს. აბიტურიენტებს უნივერსიტეტის ისტორია, პრიორიტეტები, სასასწავლო-საგანმანათლებლო პროგრამები, უნივერსიტეტში სწავლების პირობები, სტიპენდიები, სოციალური პროგრამები და არსებული სიახლეები წარუდგინეს. მომავალ სტუდენტებს უმაღლესი სასწავლებლის შესახებ სრული ინფორმაციის მისაღებად საინფორმაციო ბუკლეტები დაურიგდათ.

საჯარო და კერძო სკოლის მე-12 კლასის მოსწავლეებსა და აბიტურიენტებს შოთა რუსთაველის სახელმწიფო უნივერსიტეტის სტუდენტებმა დამდეგი შობა-ახალი წელი მიულოცეს და საახალწლო კონცერტზე მიიწვიეს. კონცერტი სააქტო დარბაზში 16 დეკემბერს, 14.00 საათზე უნივერსიტეტის კულტურის ცენტრთან არსებული, სტუდენტთა ქორეოგრაფიული და ვოკალური ანსამბლების მონაწილეობით გაიმართება. საახალწლო აქციის ფარგლებში ახალგაზრდებმა დავით აღმაშენებლის სახელობის ეკლესია და მისი მიმდებარე ტერიტორია დაასუფთავეს, ასევე მონაწილეობა მიიღეს სოფელ ახალსოფელში წმინდა გიორგის სახელობის ეკლესიის მშენებლობაში.

შოთა რუსთაველის სახელმწიფო უნივერსიტეტში ადმინისტრაციის ხელმძღვანელის არჩევნები ჩატარდა. კენჭისყრაში მონაწილოების მისაღებად საარჩევნო კომისიას რეგისტრაციისათვის სამმა კანდიდატმა: ედიშერ ჩავლეიშვილმა, ზაზა დავითაძემ და ავთანდილ ღოღობერიძემ მიმართა. აკადემიური საბჭოს სხდომაზე სამოქმედო გეგმის წარმოდგენის შემდეგ ზაზა დავითაძემ საკუთარი კანდიდატურა მოხსნა. საბჭოს წევრებმა ხმათა უმრავლესობით ედიშერ ჩავლეიშვილი აირჩიეს. ფარული კენჭისყრით მასვე დაუჭირეს მხარი წარმომადგენლობითი საბჭოს წევრებმა (ცხრამეტიდან თვრამეტი ხმა). რიგით მეოთხე კანცლერი უნივერსიტეტის ადმინისტრაციის ხელმძღვანელის თანამდებობის დაკავებამდე აჭარის განათლების, კულტურისა და სპორტის მინისტრის მოადგილე იყო.