ახალი ამბები

საქართველოს განათლებისა და მეცნიერების მინისტრი თამარ სანიკიძე, მინისტრის მოადგილე გიორგი შარვაშიძესთან, საქართველოს ტურიზმის ეროვნული ადმინისტრაციის ხელმძღვანელთან გიორგი სიგუასთან და აჭარის განათლების, კულტურისა და სპორტის მინისტრთან გიორგი თავამაიშვილთან ერთად, ბათუმის შოთა რუსთაველის სახელმწიფო უნივერსიტეტს ეწვია. შეხვედრაზე მინისტრმა სტუდენტებსა და პროფესორ-მასწავლებლებს უმაღლესი განათლების სფეროში დაგეგმილი სიახლეები და პრიორიტეტები გააცნო. ახალგაზრდებს ასევე შესთავაზა ახალი ინიციატივა, რომლის მიხედვითაც, სტუდენტები მოსახლეობის საყოველთაო აღწერის პროგრამაში ჩაერთვებიან. საქართველოს ტურიზმის ეროვნული ადმინისტრაციის ხელმძღვანელმა გიორგი სიგუამ სტუდენტებს მობილური გიდების პროგრამა წარუდგინა. შეხვედრა კითხვა-პასუხის რეჟიმში გაგრძელდა და მინისტრმა თამარ სანიკიძემ სტუდენტების შეკითხვებს უპასუხა. ახალგაზრდები სასწავლო გრანტებით, უფასო საგანმანათლებლო პროგრამებით, სტაჟირებით, საზაფხულო სკოლებით, დასაქმების ხელშემწყობი პროექტებით და სხვა აქტუალური საკითხებით დაინტერესდნენ.

აფხაზთა მუჰაჯირობის 150 წელს მიეძღვნა სამეცნიერო კონფერენცია თემაზე: „ჩვენ ერთი ტკივილი და სიხარული გვქონდა“. პროფესორ-მასწავლებლებმა და მკვლევარებმა სესიაზე ქართულ-აფხაზური ურთიერთობების საკითხები განიხილეს. მომხსენებლებმა სესიაზე ნაშრომები წარმოადგინეს ისეთ მნიშვნელოვან თემებზე, როგორიცაა: საზოგადოებრივ-პოლიტიკური და დემოგრაფიული ვითარება XVI-XVII საუკუნეების დასავლეთ საქართველოში, მუჰაჯირობა XIX საუკუნის 60-იანი წლების აფხაზეთში, მუჰაჯირობა აჭარაში, ქართული სამღვდელოება და აფხაზეთის პრობლემები XIX საუკუნის I ნახევარში. სამეცნიერო კონფერენცია ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტისა და ქართულ-აფხაზური მეგობრობის საზოგადოების „ძმობის“ ორგანიზებით გაიმართა.

ესეების კონკურსის „ქვათა ღაღადის“ საუკეთესო ნაშრომების ავტორების დაჯილდოება შედგა ბათუმის შოთა რუსთაველის სახელმწიფო უნივერსიტეტში. კულტურული მემკვიდრეობის დაცვის პრობლემებზე წარმოდგენილ 30-მდე ესეს შორის 7 გამარჯვებულ კონკურსანტს ორგანიზატორებმა სამახსოვრო საჩუქრები და სამცხე-ჯავახეთის ერთდღიანი ტურის საგზურები გადასცეს. ესეების კონკურსის მონაწილეებს აჭარის კულტურული მემკვიდრეობის და ძეგლთა დაცვის სააგენტოს ხელმძღვანელმა ბიძინა აფხაზავამ არქეოლოგიურ გათხრებში მონაწილეობა შესთავაზა. ესეების კონკურსი ძეგლებისა და ღირსშესანიშნავი ადგილების საერთაშორისო დღის ფარგლებში უნივერსიტეტის სტუდენტთა სამეცნიერო ცენტრის, სტუდენტთა მომსახურებისა და მხარდაჭერის სამსახურის ორგანიზებითა და აჭარის კულტურული მემკვიდრეობის და ძეგლთა დაცვის სააგენტოს მხარდაჭერით ჩატარდა.

ბათუმის შოთა რუსთაველის სახელმწიფო უნივერსიტეტსა და საქართველოს მთავარ პროკურატურასთან მემორანდუმი გაფორმდა. დოკუმენტი პროკურორების მიერ სამართალმცოდნეობის სპეციალობის სტუდენტებისათვის ლექციებისა და სემინარების ჩატარებას, იმიტირებული სასამართლო პროცესების გამართვასა და პროფესორ-მასწავლებლების პროექტებში ჩართულობას ითვალისწინებს. ღონისძიების ფარგლებში საქართველოს პროკურატურის წარმომადგენლებმა ბსუ-ს ის სტუდენტები დაჯილდოვეს, რომლებმაც პროკურატურაში სტაჟირება გაიარეს და მონაწილეობა მიიღეს პროექტში ,,ერთი დღე პროკურორად“.

ტემპუსის პროექტის ,,სტუდენტთა კარიერული მომსახურების დანერგვა საქართველოში“ (CASEDE) ეგიდით ბათუმის შოთა რუსთაველის სახელმწიფო უნივერსიტეტში მორიგი სემინარი გაიმართა. სამი დღის განმავლობაში პროექტის პარტნიორი უნივერსიტეტების წარმომადგენლები ინგლისელ, უნგრელ და ლიტველ ექსპერტებთან ერთად, სტუდენტთა კარიერული განვითარების აქტუალურ საკითხებზე მსჯელობდნენ. შეხვედრაზე მონაწილეებმა ბოლო პერიოდში დანერგილი პროექტები განიხილეს და ერთიანი კონცეფცია შეიმუშავეს. პროექტის მიზანი საქართველოში სტუდენტთა კარიერული მომსახურების დანერგვა და განვითარებაა.