თანამშრომლობის მემორანდუმი გაფორმდა არასამთავრობო ორგანიზაციებს „შეზღუდული შესაძლებლობების მქონე პირთა უფლებებისათვის“ და „ევროპის იურისტ სტუდენტთა ასოციაცია საქართველოს ლოკალურ ჯგუფ ელსა ბათუმს“ შორის. ხელშეკრულების ფარგლებში შეიქმნება სამართლებრივი პროგრამები ბათუმის შოთა რუსთაველის სახელმწიფო უნივერსიტეტის სტუდენტებისათვის. დოკუმენტი მიზნად ისახავს ერთობლივი პროექტების შემუშავებასა და ტრენინგების ორგანიზებას.
„აჭარის განათლების ფონდის“ უცხო ენებისა და კომპიუტერის შემსწავლელი უფასო კურსების წარდგინება ჩატარდა ბათუმის შოთა რუსთაველის სახელმწიფო უნივერსიტეტში. ორგანიზაციის წარმომადგენლებმა სტუდენტებსა და პროფესორ-მასწავლებლებს მიმდინარე პროგრამები და დაგეგმილი პროექტები გააცნეს. ინგლისური, გერმანული, ფრანგული, თურქული, რუსული ენები და კომპიუტერული ტექნოლოგიები 2011 წლიდან შეისწავლება ბათუმსა და აჭარის ყველა მუნიციპალიტეტში. ფონდი მსურველებს აგრეთვე სთავაზობს TOEFL-ის გამოცდისთვის მოსამზადებელ უფასო კურსს. აღნიშნულ პროგრამებში მონაწილეობა შეუძლია საქართველოს ნებისმიერ მოქალაქეს, რომლის მინიმალური ასაკია 18 წელი.
ბათუმის შოთა რუსთაველის სახელმწიფო უნივერსიტეტს თურქეთის გენერალური კონსული ბათუმში იასინ თემიზქანი ეწვია. დიპლომატიური კორპუსის წარმომადგენელი უნივერსიტეტის რექტორს, პროფესორ ალიოშა ბაკურიძეს შეხვდა და უმაღლესი საგანმანათლებლო დაწესებულების ისტორიას, სასწავლო პროგრამებსა და საუნივერსიტეტოს ცხოვრებას გაეცნო. მხარეებმა ორი ქვეყნის ურთიერთობებსა და სამომავლო გეგმებზე ისაუბრეს. გაცნობითი ხასიათის შეხვედრაზე დაიგეგმა ერთობლივი სასწავლო-საგანმანათლებლო პროექტებისა და გაცვლითი პროგრამების განხორციელება. შეხვედრის დასასრულს, კონსულმა უნივერსიტეტის თურქოლოგიის კაბინეტი და მატერიალურ-ტექნიკური ბაზა დაათვალიერა. თურქეთის გენერალური კონსული ბათუმში იასინ თემიზქანი უნივერსიტეტის საერთაშორისო ურთიერთობის მიმართულების სტუდენტებისათვის სემინარებს ჩაატარებს.
უნივერსიტეტში წიგნის - „შეფასება სწავლებისათვის ინკლუზიურ სკოლებში“ პრეზენტაცია ჩატარდა. საუნივერსიტეტო სწავლებისათვის განკუთვნილი სახელმძღვანელო საქართველოს განათლებისა და მეცნიერების სამინიტროსა და ნორვეგიის განათლებისა და კვლევის სამინიტროს თანამშრომლობის ფარგლებში შეიქმნა. ინკლუზიური განათლების ბრიტანელი ექსპერტების რიჩარდ როსისა და კნურ როარ ენგის ნაშრომის მიზანია სწავლების პროცესში შეფასების მნიშვნელობის, ახლებური მიდგომებისა და თანამედროვე ხედვის წარმოჩენა. წიგნი დახმარებას გაუწევს განათლების ფაკულტეტის პროფესორ-მასწავლებლებს, სტუდენტებსა და ინკლუზიური სწავლების პედაგოგებს.
ბათუმის შოთა რუსთაველის სახელმწიფო უნივერსიტეტში აჭარის ა.რ. განათლების, კულტურისა და სპორტის სამინისტროს პროგრამის - „ვასწავლოთ მომავალი წარმატებისთვის“ წარდგინება გაიმართა. პრეზენტაციაზე სტუდენტები პროექტში შეტანილ ცვლილებებსა და კონკურსში მონაწილეობის პირობებს გაეცნენ. „ვასწავლოთ მომავალი წარმატებისთვის“ 2011 წლიდან ხორციელდება და მიზნად ისახავს მაღალმთიანი აჭარის სკოლებში არსებული მასწავლებლის ვაკანსიების შევსებას. პროგრამაში მონაწილეობის მსურველებმა ორ ეტაპიანი კონკურსი უნდა გაიარონ. ხელფასის გარდა, გამარჯვებული კონკურსანტები სამინისტროსგან დამატებით ანაზღაურებას მიიღებენ.
