ახალი ამბები

ბათუმის შოთა რუსთაველის სახელმწიფო უნივერსიტეტმა ხულოს, შუახევისა და ქედის მუნიციპალიტეტებში ღია კარის დღე გამართა. რექტორის მოადგილემ თამარ სირაძემ და პროფესორ-მასწავლებლებმა აბიტურიენტებს უნივერსიტეტის საგანმანათლებლო პროგრამები, სტიპენდიები, პრიორიტეტები, საუნივერსიტეტო ცხოვრება, გაცვლითი და სოციალური პროგრამები, სწავლის პირობები გააცნეს. ბსუ-ს წარდგინების დასასრულს, მომავალ სტუდენტებს უნივერსიტეტის საინფორმაციო ბუკლეტებთან ერთად, სამახსოვრო საჩუქრები გადაეცათ.

ფრანკოფონიის დღეების ფარგლებში ბათუმის შოთა რუსთაველის სახელმწიფო უნივერსიტეტის რექტორს მერაბ ხალვაშს ფრანგული ინსტიტუტის დირექტორი, საფრანგეთის ელჩის მრჩეველი თანამშრომლობისა და კულტურის საკითხებში პიერ კლუე შეხვდა. გაცნობითი ხასიათის შეხვედრა მიზნად ისახავდა საფრანგეთის უნივერსიტეტებთან თანამშრომლობის გაღრმავებას და ერთობლივი საგანმანთლებლო პროგრამების განხორციელებას. მხარეებმა ისაუბრეს საფრანგეთის უმაღლეს საგანმანათლებლო დაწესებულებებთან ორმაგი დიპლომის გაცემისა და კონსორციუმის შექმნის საკითებზე, ასევე ფრანგულის ენის პოპულარიზაციის ხელშეწყობისა და განვითარების პერსპექტივებზე.

საქართველოს პრემიერ-მინისტრი მამუკა ბახტაძე ბათუმის შოთა რუსთაველის სახელმწიფო უნივერსიტეტში სტუდენტებსა და დამამთავრებელი კლასების მოსწავლეებს შეხვდა. მთავრობის მეთაურმა ახალგაზრდებს განათლების მასშტაბური რეფორმის დეტალები გააცნო და მათ შეკითვებს უპასუხა. პრემიერმა განათლების პრიორიტეტულობის ბიუჯეტში ასახვის აუცილებლობასა და 21-ე საუკუნეში ადამიანური კაპიტალის განვითარების მნიშვნელობაზე გაამახვილა ყურადღება.

გერმანიის შვერინის უმაღლესი სასწავლებლის პროფესორს, „Solutions Holding GmbH“ აღმასრულებელ დირექტორს შტეფან გერჰარდს ბათუმის შოთა რუსთაველის სახელმწიფო უნივერსიტეტის აკადემიურმა საბჭომ საპატიო დოქტორის წოდება მიანიჭა. პროფესორმა შტეფან გერჰარდმა მნიშვნელოვანი წვლილი შეიტანა უნივერსიტეტის განვითარებაში, ტურიზმის მიმართულების საგანმანათლებლო და სამეცნიერო-კვლევითი პროგრამების განხორციელებაში, გერმანიში ბსუ-ს ტურიზმის ფაკულტეტის პროფესორ-მასწავლებლების სტაჟირებასა და სტუდენტების სწავლებაში. ტურისტულ ინდუსტრიაში კონსალტინგური საქმიანობისა და ცენტრალურ ევროპაში სერტიფიცირებული მრჩევლის 30-წლიანი გამოცდილებით პროფესორი შტეფან გერჰარდი ინდუსტრიის აღიარებულია ექსპერტია.

თბილისში, საბერძნეთის რესპუბლიკის საელჩოს ორგანიზებითა და ბათუმის შოთა რუსთაველის სახელმწიფო უნივერსიტეტთან თანამშრომლობით საბერძნეთის დამოუკიდებლობის 198-ე წლის იუბილე აღინიშნა. ღონისძიების ფარგლებში ბსუ-ს პროფესორ-მასწავლებელთა მონოგრაფიის „პონტოელი ბერძნები აჭარაში - წარსული და თანამედროვეობა" წარდგენა გაიმართა, ასევე მოეწყო აჭარაში მცხოვრებ ბერძენთა ყოფის ამსახველი ფოტოგამოფენა. უნივერსიტეტის რექტორმა მერაბ ხალვაშმა სტუმრებს მისასალმებელი სიტყვით მიმართა და ბერძენ ხალხს ისტორიული დღე მიულოცა. ღონისძიებას საქართველოს აღმასრულებელი, საკანონმდებლო ხელისუფლების წარმომადგენლები და დიპლომატიური კორპუსის წევრები ესწრებოდნენ.