ახალი ამბები

ბათუმის შოთა რუსთაველის სახელმწიფო უნივერსიტეტში ქართული ფილოლოგიის დეპარტამენტის ორგანიზებით (მოდერატორი ასოცირებული პროფესორი ნანა ტრაპაიძე) ღონისძიება „აკადემიური წერა - პროცესი და შედეგები“ გაიმართა. ბსუ-ში მიმდინარე წლიდან პირველად სასწავლო საპილოტე სასწავლო კურსი აკადემიური წერა „მუდლის“ პროგრამის გამოყენებით ხორციელდება და ორიენტირებულია ცოდნაზე, ანალიზზე, აკადემიურ კეთილსინდისიერებაზე, ანტიპლაგიატზე. ღონისძიებაზე სხვადასხვა სპეციალობის სტუდენტებმა (ჰუმანიტარული, საბუნებისმეტყველო, ეკონომიკური, სამართლის მეცნიერებების და ტურიზმის) აკადემიური წერის სასწავლო კურსის ფარგლებში სხვადასხვა თემაზე შესრულებული კვლევების შედეგები პრეზენტაციების სახით წარმოადგინეს . სტუდენტებმა კარგად წარმოაჩინეს სასწავლო პროცესში შეძენილი ცოდნა: ზეპირი მეტყველების, ანალიზის და კრიტიკული აზროვნების უნარ-ჩვევები.

ლანჩხუთის სოფელ ჩიბათის საჯარო სკოლის სამოქალაქო განათლების მასწავლებელი, საქართველოს მასწავლებლის ეროვნული ჯილდოს მფლობელი, 2019 წლის „მასწავლებლის გლობალური ჯილდოს“ ფინალისტი, ვარკის ფონდისა და გლობალური ჯილდოს ელჩი ლადო აფხაზავა ბათუმის შოთა რუსთაველის სახელმწიფო უნივერსიტეტის სტუდენტებს შეხვდა და სემინარი ჩაატარა თემაზე: „ლიდერობა“. ლადო აფხაზავამ განათლების მნიშვნელობა, სამოქალაქო თვითშეგნებისა და პასუხისმგებლობის საკითხები ახალგაზრდებს საკუთარ მოსწავლეებთან ურთიერთობის მაგალითებითა და ინტერაქციული დავალებებით გაუზიარა.

ევროკავშირის საგრანტო პროგრამის „ERASMUS+–ის“ პროექტის „უკეთესი კომუნიკაციის ხელშეწყობა“ (ABC) ფარგლებში ბათუმის შოთა რუსთაველის სახელმწიფო უნივერსიტეტში ავეიროს უნივერსიტეტის ჯანმრთელობის სკოლის ლექტორმა, მედიცინის დოქტორმა განვითარების ფსიქოლოგიის მიმართულებით იზაბელ მონტეირო და კოსტამ საჯარო ლექცია ჩაატარა თემაზე: „სმენითი/აუდიო ვერბალური თერაპია („მოუსმინე, რომ ისაუბრო“ უნარის გამომუშავება)“. მომხსენებელმა ბსუ-ს განათლების, მედიცინისა და ფსიქოლოგიის საგანმანათლებლო პროგრამების სტუდენტებს ენისა და მეტყველების თერაპიასთან დაკავშირებული ისეთი აქტუალური საკითხები გააცნო, როგორიცაა: რას უნდა ველოდეთ ბავშვისგან, რომელიც იბადება სმენადაქვეითებული? რა პირობები უნდა გვქონდეს სასაუბრო ენისთვის? ბგერის წვდომა; მიზნობრივი ინტერაქცია მასთან, ვინც იყენებს ენას.

ბათუმის შოთა რუსთაველის სახელმწიფო უნივერსიტეტში დედა ენის დღისადმი მიძღვნილი ღონისძიებების ფარგლებში ლიტერატურული საღამო: „დედაენა, პოეზია, სიყვარული“ ჩატარდა. ლიტერატურული საღამო ბსუ-ს ჰუმანიტარულ მეცნიერებათა ფაკულტეტის ქართული ფილოლოგიის დეპარტამენტის ორგანიზებით ჩატარდა და ირაკლი აბაშიძის დაბადებიდან 110, გიორგი ლეონიძის - 120 და იოსებ გრიშაშვილის - 130 წლისთავს ეძღვნებოდა. ქართული ფილოლოგიის მიმართულების სტუდენტებმა ლიტერატურულ-მუსიკალური კომპოზიციით გაიხსენეს ქართველი პოეტების შემოქმედება და გასული საუკუნის ლიტერატურული ცხოვრება გააცოცხლეს. ახალგაზრდებმა საიუბილეო საღამოზე ირაკლი აბაშიძის, გიორგი ლეონიძის, იოსებ გრიშაშვილის ლექსები წაიკითხეს დამათ ლექსებზე შექმნილი სიმღერები შეასრულეს.

დედა ენის დღისადმი მიძღვნილი ღონისძიებების ფარგლებში ბათუმის შოთა რუსთაველის სახელმწიფო უნივერსიტეტში პროფესორ მალხაზ ჩოხარაძის დოკუმენტური ფილმის „ამბავი თორმეტი სავანისა“ პრემიერა გაიმართა. ფილმში ასახულია კლარჯეთის „ათორმეტ სავანეთა“ მხარის წარსული და თანამედროვეობა, ქართველებისა და ქართული ენის მდგომარეობა ისტორიულ სამხრეთ საქართველოში - ტაოში, კლარჯეთსა და შავშეთში. სცენარის სამეცნიერო საფუძველია მონოგრაფია „ხანძთა და ათორმეტ სავანეთა მხარის ძველი სალოცავები. ფილმში გამოყენებულია 2005-2018 წლების სამეცნიერო ექსპედიციების საველე ვიდეომასალა: პროფესორ მალხაზ ჩოხარაძის და ბსუ-ს ჰუმანიტარულ მეცნიერებათა ფაკულტეტის ქართველოლოგიის ცენტრის ვიდეოარქივი.