ახალი ამბები

ბათუმის შოთა რუსთაველის სახელმწიფო უნივერსიტეტში იუსტიციის სამინისტროს ახალგაზრდული კლუბ „YOUTHTITIA" შესახებ საინფორმაციო შეხვედრა გაიმართა. ახალგაზრდული კლუბის ფარგლებში დაგეგმილი აქტივობების, პროფესიული და სოციალური ტრენინგების შესახებ სტუდენტებს ინფორმაცია მიაწოდეს იუსტიციის სასწავლო ცენტრის დირექტორმა ვახტანგ ჟვანიამ და ცენტრის წარმომადგენლებმა. შეხვედრის მონაწილეებს მიესალმნენ და პროექტის მნიშვნელობაზე ისაუბრეს ბსუ-ს რექტორის მოადგილემ ანზორ ბერიძემ და იურიდიული და სოციალურ მეცნიერებათა ფაკულტეტის დეკანმა ლევან ჯაყელმა.

9-11 აპრილს ევროკომისიის მიერ დაფინანსებული პროექტის „კვლევის პასუხისმგებლიანად წარმართვა – კვლევის კეთილსინდისიერება და ეთიკა ქართულ უნივერსიტეტებში (“Responsible Conduct of Research – Research Integrity and Ethics in Georgian Universities“ – ETHICS) ფარგლებში, კონსორციუმის მეორე საერთაშორისო შეხვედრა და სასწავლო ვიზიტი გაიმართა. შეხვედრას ესწრებოდნენ პროექტის კონსორციუმის 10 ქართული უმაღლესი საგანმანათლებლო დაწესებულების, 3 ევროპული უნივერსიტეტისა და ევროპული არასაუნივერსიტეტო პარტნიორი ორგანიზაციის წარმომადგენლები, საქართველოს განათლების, მეცნიერებისა და ახალგაზრდობის სამინისტროს, შოთა რუსთაველის საქართველოს ეროვნული სამეცნიერო ფონდისა და განათლების ხარისხის განვითარების ეროვნული ცენტრის წარმომადგენლები.

„ფრანკოფონია-2024’’ ბათუმის შოთა რუსთაველის სახელმწიფო უნივერსიტეტში საფრანგეთში მოღვაწე ქართველი პიანისტის გიორგი ბერიაშვილის ლექცია-კონცერტით „ფრანგული მუსიკის ოთხი მწვერვალი“ დასრულდა. მუსიკათმცოდნემ და საფრანგეთის ხელოვნების აკადემიის დელ დუკას პრემიის ლაურეატმა გიორგი ბერიაშვილმა ღონისძიებაზე წარმოადგინა საგანმანათლებლო ციფრული პლატფორმა და CD-ი, ისაუბრა კლოდ დებიუსის, ჟან-ფილიპ რამოს, ოლივიე მესიანის, სეზარ ფრანკის შემოქმედებაზე და შეასრულა ფრაგმენტები კომპოზიტორების ნაწარმოებებიდან.

9 აპრილის ტრაგედიიდან 35 წელი გავიდა. ბათუმის შოთა რუსთაველის სახელმწიფო უნივერსიტეტის რექტორის მოადგილე ანზორ ბერიძე, ადმინისტრაციის ხელმძღვანელი მერაბ დიასამიძე, პროფესორ-მასწავლებლები და სტუდენტები გმირთა ხეივანში შეიკრიბნენ, მემორიალი ყვავილებით შეამკეს და საქართველოს დამოუკიდებლობისთვის დაღუპულთა ხსოვნას პატივი მიაგეს. 1989 წლის 9 აპრილს საქართველოს დამოუკიდებლობის მოთხოვნით მოწყობილი მშვიდობიანი საპროტესტო აქცია საბჭოთა არმიის საგანგებო დანიშნულების ჯარისკაცებმა სასტიკად დაარბიეს, რასაც 21 უდანაშაულო ადამიანის სიცოცხლე ემსხვერპლა. 2 წლის შემდეგ, 1991 წლის 9 აპრილს, მიღებული იქნა საქართველოს სახელმწიფოებრივი დამოუკიდებლობის აღდგენის აქტი.

ბათუმის შოთა რუსთაველის სახელმწიფო უნივერსიტეტში 9 აპრილისადმი მიძღვნილი დისკუსია გაიმართა თემაზე: „9 აპრილი - ტრაგედიიდან დამოუკიდებლობის აღდგენამდე“. სტუდენტებმა, პროფესორ-მასწავლებლებმა, ბათუმის ელიტური სკოლა „გორდას“, სკოლა „მონპარნასის“, ბათუმის N2 საჯარო სკოლის პედაგოგებმა და მოსწავლეებმა გაიხსენეს 1989 წლის 9 აპრილს დატრიალებული ტრაგედია, საქართველოს დამოუკიდებლობისათვის დაღუპული გმირები და 35 წლის წინ განვითარებულ მოვლენებზე იმსჯელეს. დისკუსიას მოდერატორობას უწევდნენ ბსუ-ს პროფესორები: ჯემალ კარალიძე და ოთარ გოგოლიშვილი.