პლაგიატის პრევენციის საერთაშორისო დღე ბათუმის შოთა რუსთაველის სახელმწიფო უნივერსიტეტში რამდენიმე ღონისძიებით აღინიშნა. მოეწყო „პლაგიატის შესახებ სტუდენტური პოსტერების კონკურსის“ ფინალური ნამუშევრების გამოფენა, პლაგიატის პრევენციის შესახებ მომზადებული ვიდეორგოლის ჩვენება და ჩატარდა ვიქტორინა. გამარჯვებულებს პლაგიატის ცნობიერების ამაღლების მიზნით თემატური საჩუქრები გადაეცათ.
ბათუმის შოთა რუსთაველის სახელმწიფო უნივერსიტეტის ფოლკლორული ანსამბლი „თირინი“ საერთაშორისო ხელოვნების XV კონკურსის გამარჯვებულია. საქართველოს, ბულგარეთის, ლიეტუვას, ლატვიის, ესტონეთის 20-მდე შემოქმედებით ჯგუფს შორის „თირინმა“ პირველი ადგილი დაიკავა და ჟიურის მოწონება დაიმსახურა საუკეთესო ფოლკლორული ნიმუშის წარდგენისა და შესრულებისათვის. ღონისძიების ორგანიზატორებმა ანსამბლის წევრებს სამახსოვრო საჩუქრები გადასცეს. უნივერსიტეტის ფოლკლორულ ანსამბლ „თირინს“ ულოცავს გამარჯვებას და უსურვებს წარმატებებს.
დავით აღმაშენებლის ხსენების დღისადმი მიძღვნილი კონფერენცია „დავითობა - 2020“ გაიმართა ბათუმის შოთა რუსთაველის სახელმწიფო უნივერსიტეტში. ღონისძიება გახსნეს და მონაწილეებს მიესალმნენ ბსუ-ს რექტორი მერაბ ხალვაში, ჰუმანიტარულ მეცნიერებათა ფაკულტეტის დეკანი მარინა გიორგაძე და ისტორიის, არქეოლოგიისა და ეთნოლოგიის დეპარტამენტის ხელმძღვანელი ჯემალ კარალიძე. სესიაზე ბათუმის საჯარო და კერძო სკოლების მოსწავლეებმა სტუდენტების კონსულტირებით მომზადებული მოხსენებები წარმოადგინეს დავით აღმაშენებლის მიერ გატარებულ რეფორმებსა და ეპოქის აქტუალურ საკითხებზე. კონფერენცია ბსუ-ს ჰუმანიტარულ მეცნიერებათა ფაკულტეტის ისტორიის, არქეოლოგიისა და ეთნოლოგიის დეპარტამენტსა და ბათუმის ზოგადსაგანმანათლებლო დაწესებულებების თანამშრომლობის ფარგლებში ჩატარდა.
ბსუ-ს ნიკო ბერძენიშვილის ინსტიტუტისა და აჭარის. ა.რ. უმაღლესი საბჭოს ორგანიზებით გამოფენა „საარქივო დოკუმენტები სტამბოლის ქართული სავანიდან“. ღონისძიება ბათუმის შოთა რუსთაველის სახელმწიფო უნივერსიტეტის რექტორმა მერაბ ხალვაშმა, აჭარის. ა.რ. უმაღლესი საბჭოს თავმჯდომარემ დავით გაბაიძემ, აჭარის. ა.რ. განათლების, კულტურისა და სპორტის მინისტრმა მაია ხაჯიშვილმა და ბსუ-ს ნიკო ბერძენიშვილის ინსტიტუტის დირექტორმა როინ მალაყმაძემ გახსნეს. გამოფენაზე წარმოდგენილი იყო ნიკო ბერძენიშვილის ინსტიტუტის მკვლევართა მიერ მოპოვებული 50-ზე მეტი საარქივო დოკუმენტი სტამბოლის ქართული სავანიდან, რომლებიც მე-19 საუკუნის მეორე ნახევრიდან მე-20 საუკუნის 80-იან წლებამდე პერიოდის საქართველოს საზოგადოებრივ-სოციალურ ყოფას და პოლიტიკურ ვითარებას ასახავს. ღონისძიების ფარგლებში ბსუ-ს ნიკო ბერძენიშვილის ინსტიტუტსა და აჭარის. ა.რ. უმაღლესი საბჭოს შორის თანამშრომლობის მემორანდუმი გაფორმდა.
17 თებერვალს, ილიას სახელმწიფო უნივერსიტეტში პლაგიატის შესახებ სტუდენტური კონკურსის დასკვნითი ღონისძიება გაიმართა. კონკურსი მიმდინარეობდა პროექტის „აკადემიური კეთილსინდისიერება ხარისხიანი სწავლისა და სწავლებისთვის ქართულ უმაღლეს საგანმანათლებლო დაწესებულებაში (INTEGRITY)“ ფარგლებში. საქართველოს სხვადასხვა უმაღლესი სასწავლებლიდან 140-მა კონკურსანტმა მიიღო მონაწილეობა. 25 ფინალისტის პოსტერებს შორის წარმოდგენილი იყო ბათუმის შოთა რუსთაველის სახელმწიფო უნივერსიტეტის ზუსტ მეცნიერებათა და განათლების ფაკულტეტის ფიზიკის სტუდენტის ანა სურმანიძის ნამუშევარი. დასკვნით ღონისძიებაზე გამოვლინდნენ გამარჯვებულები.
