ახალი ამბები

აჭარის ა.რ. მთავრობის თავმჯდომარემ თორნიკე რიჟვაძემ ბათუმის შოთა რუსთაველის სახელმწიფო უნივერსიტეტის რექტორთან მერაბ ხალვაშთან და საქართველოს ინოვაციებისა და ტექნოლოგიების სააგენტოს თავმჯდომარესთან ავთანდილ კასრაძესთან ერთად, ბსუ-ს ახალი სასწავლო კორპუსის მშენებლობა დაათვალიერა. თანამედროვე სტანდარტების ახალი სასწავლო კორპუსის მშენებლობა დასრულდა და მიმდინარეობს ინტერიერის მოწყობა. შენობის პირველ სართულზე ტექნოპარკი, ხოლო მეორე და მესამე სართულზე პროფესიული პროგრამების მართვის და უწყვეტი განათლების ცენტრი განთავსდება, რომელიც ფუნქციონირებას შემოდგომაზე დაიწყებს.

საქართველოს ჩემპიონი ონლაინ დებატებში „ერთი-ერთზე“ ბსუ-ს ეკონომიკისა და ბიზნესის ფაკულტეტის ბიზნესის ადმინისტრირების საბაკალავრო საგანმანათლებლო პროგრამის IV კურსის სტუდენტი გოგიტა ბარამიძე გახდა. პირველობა 20 აპრილის დაიწყო და 6 ივნისს დასრულდა. ტურნირში მონაწილეობა მიიღო საქართველოს ყველაზე პროგრესულად მოაზროვნე 16-35 წლის 64-მა ახალგაზრდამ. ჩემპიონატი „საერთაშორისო რესპუბლიკური ინსტიტუტის“ ორგანიზებით და საქართველოს საგანმანათლებლო დებატების ასოციაციის პარტნიორობით გაიმართა. ბათუმის შოთა რუსთაველის სახელმწიფო უნივერსიტეტი ულოცავს გოგიტა ბარამიძეს გამარჯვებას და უსურვებს წარმატებებს.

ბათუმის შოთა რუსთაველის სახელმწიფო უნივერსიტეტის ფიტოპათოლოგიისა და ბიომრავალფეროვნების ინსტიტუტის კოლხეთის ტორფნარებისა და წყლის ეკოსისტემების კონსერვაციის განყოფილების მეცნიერ-თანამშრომლებმა გარემოს დაცვის საერთაშორისო დღესთან დაკავშირებით ენდემური სახეობის 200-მდე ხე დარგეს. ბსუ-ს მკლევარებმა ღონისძიების ფარგლებში, ფიტოპათოლოგიისა და ბიომრავალფეროვნების ინსტიტუტის ეზოში, ასევე ქობულეთის დაცული ტერიტორიებისა და კოლხეთის ეროვნული პარკის მომიჯნავე ტერიტორიებზე ფიტოპათოლოგიისა და ბიომრავალფეროვნების ინსტიტუტის სამეცნიერო ლაბორატორიაშია გამოყვანილი, კოლხეთის რელიქტური ტყეების გლობალური წითელი ნუსხისა და ენდემური სახეობების ლაფანისა და ჰართვისის მუხები დარგეს.

საქართველოს დამოუკიდებლობის აღდგენის დღე ბათუმის შოთა რუსთაველის სახელმწიფო უნივერსიტეტის პროფესორ-მასწავლებლებმა სამეცნიერო კონფერენციით აღნიშნეს. კონფერენცია გახსნეს და მონაწილეებს საქართველოს დამოუკიდებლობის აღდგენის დღე მიულოცეს ბსუ-ს რექტორმა მერაბ ხალვაშმა და ჰუმანიტარულ მეცნიერებათა ფაკულტეტის დეკანმა მარინა გიორგაძემ. სესიაზე ბსუ-ს მკვლევარებმა საქართველოს სხვადასხვა უნივერსიტეტის წარმომადგენლებთან ერთად, 102 წლის წინ განვითარებული მოვლენები შეაფასეს.

ბსუ-ს იურიდიული და სოციალურ მეცნიერებათა ფაკულტეტის ორგანიზებით საქართველოს დამოუკიდებლობის დღისადმი მიძღვნილი კონფერენცია: „დამოუკიდებლობის მოპოვება, აღდგენა, შენარჩუნება“ ჩატარდა ZOOM-ის ონლაინ პლატფორმაზე. სესიაზე საქართველოს სხვადასხვა უმაღლესი საგანმანათლებლო დაწესებულების პროფესორ-მასწავლებლებმა მოხსენებები წარმოადგინეს 1918 წლის 26 მაისის მოვლენებთან დაკავშირებულ საკითხებზე. განხილული იყო ისეთი აქტუალური საკითხები, როგორიცაა: „1918 წლის 26 მაისი მის თანამედროვეთა აღქმებსა და შეფასებებში“, „დამოუკიდებლობის აქტით დეკლარირებული პრინციპების დამკვიდრება საქართველოს 1921 წლის კონსტიტუციაში“, „საქართველოს დემოკრატიული რესპუბლიკის საკანონმდებლო ორგანო და კანონმდებლობის ძირითადი მიმართულებანი (1918-1921)“, „ბათუმის საკითხი 1918 წლის მარტის ტრაპიზონისა და მაისის ბათუმის კონფერენციებზე“, „დამოუკიდებლობიდან დამოუკიდებლობამდე (კონსტიტუციონალიზმის განვითარების ეტაპები)“.