22-26 აგვისტოს, შვედეთის ქალაქ სტოკჰოლმში, ტექნოლოგიების სამეფო უნივერსიტეტში HEIN4.0 პროექტის ფარგლებში გამართულ სასწავლო ვიზიტსა და საკოორდინაციო შეხვედრაში მონაწილეობა მიიღეს პროექტის მენეჯერმა, ბსუ-ს ზუსტ მეცნიერებათა და განათლების ფაკულტეტის დეკანმა, პროფესორმა ლელა თურმანიძემ და ბსუ-ს ხარისხის უზრუნველყოფის სამსახურის ხელმძღვანელმა, პროფესორმა ვლადიმერ ღლონტმა. ტექნოლოგიების სამეფო უნივერსიტეტის პროფესორმა ანტონიო მაფეიმ, ფილოსოფიის დოქტორებმა მირკო ვარანომ და ფრედერიკ ენოქსონმა ჩაატარეს სემინარები მომხმარებლის საჭიროებების შესწავლისა და მათზე საგანმანათლებლო სერვისების მორგების მეთოდოლოგიაზე, ინოვაციური ტრენინგების შემუშავება-დანერგვის პერსპექტივებზე, წარმოადგინეს სხვადასხვა საერთაშორისო პროექტის შედეგები, გამოცდილება და ისაუბრეს ახალი პროექტების შემუშავების შესაძლებლობებზე.

ბათუმის შოთა რუსთაველის სახელმწიფო უნივერსიტეტის ტექნოლოგიური ფაკულტეტის „ნავთობისა და გაზის ინჟინერიის“ საბაკალავრო საგანმანათლებლო პროგრამამ წარმატებით გაიარა პროგრამული აკრედიტაცია. ვულოცავთ ბსუ-ს სტუდენტებსა და პროფესორ-მასწავლებლებს მნიშვნელოვან გამარჯვებას და ვუსურვებთ წარმატებებს!

სრული, უპირობო აკრედიტაცია მოიპოვა ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის სტომატოლოგიის ერთსაფეხურიანმა საგანმანათლებლო პროგრამამ. ვულოცავთ ბსუ-ს სტუდენტებსა და პროფესორ-მასწავლებლებს მნიშვნელოვან გამარჯვებას.

საქართველოს სტრატეგიისა და საერთაშორისო ურთიერთობების კვლევის ფონდმა (რონდელის ფონდი) რონდელის ფონდის უფროსი მკვლევრის ვლადიმერ პაპავას ხელმძღვანელობით ჩაატარა სამეცნიერო სემინარი „პოლიტეკონომიური საუბრები ლადო პაპავასთან" – რეგიონალიზმი და ქვეყნის ადმინისტრაციულ-ტერიტორიული მოწყობა: ანალიზი, შეფასება, პერსპექტივები, სადაც მომხსენებელი ეკონომიკურ მეცნიერებათა დოქტორი, პროფესორი, ბათუმის შოთა რუსთაველის სახელმწიფო უნივერსიტეტის ხარისხის უზრუნველყოფის სამსახურის ხელმძღვანელი ვლადიმერ ღლონტი გახლდათ.

11-15 ივლისს ბსუ-ს ჰუმანიტარულ მეცნიერებათა ფაკულტეტის ხარისხის უზრუნველყოფის სამსახურის უფროსმა, ასოცირებულმა პროფესორმა, ივდით დიასამიძემ ევროკავშირის საერთაშორისო გაცვლითი პროექტის „ერაზმუს+“-ის ფარგლებში, მონაწილეობა მიიღო ხარისხზე ორიენტირებულ სასწავლო კურსების განვითარებისადმი მიძღვნილ ტრენინგში. ზაარლანდის უნივერსიტეტში (ქალაქი ზაარბრიუკენი, გერმანია) გამართული ტრენინგი ითვალისწინებდა ისეთ თემებზე მუშაობას, როგორიცაა: შედეგზე ორიენტირებული კურიკულუმის შექმნა, სწავლის შედეგები და მიზნები, საგანმანათლებლო პროგრამის შექმნა, ახალი სასწავლო პროგრამის ხარისხის შეფასება, საერთაშორისო ხარისხის მენეჯმენტი.