ტურიზმის ფაკულტეტის ტურიზმის საბაკალავრო პროგრამის სტუდენტებისთვის საერთაშორისო სასტუმროს მენეჯმენტის ტრენინგი ჩატარდა. ყოველწლიურ შეხვედრას სასტუმროს ბიზნესისა და მასპინძლობის აქტუალურ საკითხებზე „Solutions Holding GmbH” აღმასრულებელი დირექტორი, გერმანიის სასტუმროს კონგრესის მრჩეველთა საბჭოს წევრი პროფესორი შტეფან გერჰარდი ატარებს. ორდღიანი ტრენინგის თემატიკა მოიცავდა სასტუმროს საერთაშორისო მენეჯმენტის პირობებს, სასტუმროს ინდუსტრიის საფუძვლებსა და სტრუქტურულ მახასიათებლებს, სასტუმროს ოპერირებას, მის განვითარებასა და ინვესტიციებს. ტრენინგის მონაწილე სტუდენტებს შესაძლებლობა ჰქონდათ, ჯგუფური მუშაობის ფორმატით შეემუშავებინათ ახალი სასტუმროს კონცეფცია ბათუმისთვის.

ბსუ-ს ტურიზმის ფაკულტეტი დეკანი ირაკლი კორძაია, ტურიზმის სფეროს და ტურიზმის საგანმანათლებლო პროგრამების განმახორციელებელი დაწესებულებების წარმომადგენლებთან ერთად, ტურიზმისა და სასტუმრო აღჭურვილობის მე-14 საერთაშორისო გამოფენის - „EBIT - 2023’’ ფარგლებში, აჭარის ტურიზმისა და კურორტების დეპარტამენტის მიერ ორგანიზებულ პანელურ დისკუსიაში „ტურიზმის სექტორში არსებული გამოწვევები და შესაძლებლობები“ იღებდა მონაწილეობას. პანელის მონაწილეებმა იმსჯელეს, თუ რა გამოწვევები აქვს სექტორს კვალიფიციური კადრების კუთხით, რა შესაძლებლობები არსებობს საგანმანათლებლო სფეროში არსებული გამოწვევების დასაძლევად და რამდენად ეფექტიანია ტურიზმის საგანმანათლებლო პროგრამები.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტი ტურიზმისა და სასტუმრო აღჭურვილობის მე-14 საერთაშორისო გამოფენაში - „EBIT - 2023’’ მონაწილეობს. ფაკულტეტის სტუდენტებმა და პროფესორ-მასწავლებლებმა დამთვალიერებლებს საუნივერსიტეტო ცხოვრება, სერვისები, ტურიზმის საგანმანათლებლო პროგრამა გააცნეს და ტურისტული პროდუქტები წარუდგინეს. ვიზიტორებს ასევე შესაძლებლობა მიეცათ, VR-სათვალის საშუალებით ვირტუალურად ემოგზაურათ საქართველოს სხვადასხვა კუთხეში, გაცნობოდნენ ქვეყნის ტურისტულ პოტენციალს, რესურსებსა და მარშრუტებს. გამოფენა 3 დღეს გაგრძელდება და მასში 85-მდე ადგილობრივი და საერთაშორისო ტურისტული კომპანია მონაწილეობს.

18-19 მაისს ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტმა ვროცლავის ბიზნეს უნივერსიტეტთან ერთად, მონაწილეობა მიიღო „Erasmus Mundus Design Measures“ საგრანტო პროექტის ფარგლებში, თბილისში, ევროპის უნივერსიტეტში გამართულ სამუშაო შეხვედრებში ერთობლივი სამაგისტრო პროგრამის „ნელი ტურიზმის მენეჯმენტის“ განსახორციელებლად. ერთობლივ სამაგისტრო პროგრამას 6 ქვეყნის 7 უნივერსიტეტი ამზადებს. ბსუ პროექტის ასოცირებული პარტნიორია, აზერბაიჯანის, თურქეთის და ჩეხეთის უნივერსიტეტებთან ერთად.

ბსუ-ს ტურიზმის ფაკულტეტის ასისტენტ პროფესორებმა ნარგიზ ფალავანდიშვილმა და თამარ ბერიძემ 12-13 მაისს მონაწილეობა მიიღეს ლატვიის სიცოცხლის მეცნიერებათა და ტექნოლოგიების უნივერსიტეტში გამართულ ყოველწლიურ საერთაშორისო კონფერენციაში „ეკონომიკური მეცნიერება სოფლის განვითარებისთვის“. მომხსენებლებმა სესიის მონაწილეებს გააცნეს ტურიზმის დარგში მიმდინარე სიახლეები და ინდივიდუალური კვლევის შედეგები. ასისტენტ პროფესორმა თამარ ბერიძემ კონფერენციაზე მოხსენება წარადგინა თემაზე: „ინვესტიციები ადამიანისეულ კაპიტალში და მისი ეფექტიანობის შეფასება (ტურიზმი, სოფლის მეურნეობა), ასისტენტ პროფესორმა ნარგიზ ფალავანდიშვილმა - „საერთაშორისო ბრენდულ სასტუმროებში დატვირთვასა და მომგებიანობას შორის განსხვავების ანალიზი კოვიდ 19-ით გამოწვეულ პანდემიამდე და პანდემიის შემდგომ პერიოდში“.