ტურიზმის ფაკულტეტის „სარესტორნო საქმისწარმოების“ III საფეხურის პროფესიული საგანმანათლებლო პროგრამის სტუდენტებს სერვირებასა და მომსახურებაში პრაქტიკული მეცადინეობა ჩაუტარდათ. პრაქტიკული მეცადინეობა ითვალისწინებს ექვსთვიანი სწავლების დროს მიღებული თეორიული ცოდნის გაღრმავებას და შესაბამისი უნარ-ჩვევების სრულყოფას. პრაქტიკული სწავლება ტურიზმის ფაკულტეტის რესტორნის სადემონსტრაციო ოთახში ჩატარდა და მას აჭარის ტურიზმისა და კურორტების დეპარტამენტის სერვისების განვითარების სამსახურის უფროსი გიორგი დოლიძე ხელმძღვანელობდა.

აჭარის ა.რ. ტურიზმისა და კურორტების დეპარტამენტის თავმჯდომარე სულხან ღლონტი ბსუ-ს ტურიზმის ფაკულტეტის სტუდენტებს შეხვდა. სულხან ღლონტმა ახალგაზრდებს დეპარტამენტის საქმიანობა, განხორციელებული პროექტები და სამომავლო გეგმები გააცნო. დეტალური ინფორმაცია მიაწოდა რეგიონის ტურისტული მიმართულების ცნობადობის გაზრდის კუთხით, ადგილობრივ და საერთაშორისო ბაზარზე მიმდინარე სარეკლამო კამპანიებზე, სერვისების გაუმჯობესებასა და სოფლის მეურნეობის ტურიზმის განვითარების შესაძლებლობაზე. შეხვედრა კითხვა-პასუხის რეჟიმში გაგრძელდა და სულხან ღლონტმა სტუდენტების შეკითხვებს უპასუხა.

საქართველოს დამოუკიდებლობის აღდგენის 100 წლის იუბილესადმი მიძღვნილი საჯარო ლექცია წაიკითხა თემაზე: „ქართული დიასპორა სტამბულში“ ნიკო ბერძენიშვილის კვლევითი ინსტიტუტის დირექტორმა როინ მალაყმაძემ. ტურიზმის ფაკულტეტის სტუდენტებმა გაიხსენეს 100 წლის წინ განვითარებული მოვლენები და ის საზოგადოებრივ-პოლიტიკური დატვირთვა, რაც ჰქონდა 26 მაისს საქართველოს უახლეს ისტორიაში. ლექცია მნიშვნელოვანი იყო მხარეთმცოდნეობითი თვალსაზრისითაც, ახალგაზრდები გაეცნენ თუ რამდენად მნიშვნელოვანია დღეს სტამბულის ბიბლიოთეკებსა და არქივებში დაცული ცნობები ქართული დიასპორის შესახებ.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტს „მერიოტის“ სასტუმრო ქსელის აღმოსავლეთ ევროპის ადამიანურ რესურსების რეგიონული დირექტორი სერჯიო სნაიდერი და სასტუმრო „შერატონ ბათუმის“ გენერალური მენეჯერი აპოსტოლოს პაპატოლიოსი სტუმრობდნენ. სტუმრები ტურიზმის ფაკულტეტის სტუდენტებს შეხვდნენ და აჭარაში სასტუმრო ბიზნესის განვითარების პერსპექტივებსა და სასტუმროში დასაქმების შესაძლებლობებზე ესაუბრეს. დელეგაციის წევრებმა შეხვედრის ფარგლებში განიხილეს თანამშრომლობისა და სტუდენტთა სტაჟირების შესაძლებლობები აღმოსავლეთ ევროპის მერიოტის ქსელის სასტუმროებში.

მიგრაციის საერთაშორისო ორგანიზაციის (IOM) წარმომადგენლებმა ევროკავშირის მიერ დაფინანსებული SBMMG-ის პროექტის ფარგლებში, ბათუმის შოთა რუსთველის სახელმწიფო უნივერსიტეტის სტუდენტებისათვის ტრენინგი ჩაატარეს თემაზე: „ინფორმირებული მიგრაცია, უსაზღვრო შესაძლებლობები“. სწავლება დისკუსიისა და როლური თამაშების ფორმატში წარიმართა და ახალგაზრდები გაეცნენ ისეთ აქტუალურ თემებს, როგორიცაა: უვიზო მიმოსვლა ევროპაში, თავშესაფარი ევროკავშირის წევრს ქვეყნებში, სწავლა საზღვარგარეთ, დროებითი შრომითი მიგრაცია.