ბათუმის შოთა რუსთაველის სახელმწიფო უნივერსიტეტში, იულიხის სამეცნიერო ცენტრის (გერმანია), ქართულ-გერმანული სამეცნიერო ხიდის და რსუ-ს თანამშრომლობის ფარგლებში გაიხსნა საზაფხულო სკოლა-სემინარი ფუნდამენტურ მეცნიერებებში. საზაფხულო სკოლა ინფორმაციის გაცვლისა და გამოცდილების გაზიარების გზით ხელს შეუწყობს ახალგაზრდა ქართველი მეცნიერებისა და სტუდენტების ჩართულობას მსოფლიოს ცნობილ სამეცნიერო ცენტრებში მიმდინარე და დაგეგმილ კვლევით-საგანმანათლებლო პროექტებში. სემინარში 50-ზე მეტი უცხოელი მეცნიერი, იულიხის ცენტრის დირექტორთა საბჭოს წევრები, უცხოეთის წამყვანი უნივერსიტეტების მაგისტრანტები და დოქტორანტები მონაწილეობენ. დარგის სპეციალისტები ხუთი დღის განმავლობაში იმსჯელებენ სამყაროს წარმოშობის თანამედროვე თეორიებსა და მათი შემოწმებისთვის დაგეგმილ ნულოვან ექსპერიმენტებზე, უახლესი შედეგებით მიღებულ მსოფლიოში ცნობილ ამაჩქარებლებზე: COSY, FAIR, LHC. მოხსენებებს წაიკითხავენ ისეთ მიმართულებებში როგორიცაა: მყარი სხეულების ფიზიკა, დედამიწის შემსწავლელი მეცნიერებები და გარემო, მასალათმცოდნეობა, უახლესი მიღწევები საინჟინრო და სამედიცინო მეცნიერებებში, საინფორმაციო ტექნოლოგიები. საზაფხულო სკოლა - სემინარის ფარგლებში ბათუმის შოთა რუსთაველის სახელმწიფო უნივერსიტეტის რექტორმა, პროფესორმა ალიოშა ბაკურიძემ და იულიხის ბირთული ფიზიკის ინსტიტუტის დირექტორმა ჰანს შტროერმა ხელი მოაწერეს ხელშეკრულებას. დოკუმენტით თანაშრომლობის მიმართულებები, სამომავლო გეგმები, ერთობლივი პროექტებისა და პროგრამების განხორციელების წესი განისაზღვრება.
იულიხში მოღვაწე ქართველი მეცნიერებისა და სტუდენტთა ჯგუფის (ფიზიკოსებისა და ინჟინრების) გამოცდილების გათვალისწინებით, დაგეგმილია ერთობლივი კვლევების სპექტრის გაფართოება ფუნდამენტური მეცნიერების სხვა მიმართულებითაც. ამ მიზნით რუსთაველის სამეცნიერო ფონდს გამოცხადებული აქვს 2012 წლის კონკურსი, რომლის მიზანია დაეხმაროს ქართველი მაგისტრანტებისა და დოქტორანტების პროფესიული კვალიფიკაციის ამაღლებას ცენტრში მათი სამეცნიერო სტაჟირების უზრუნველყოფის გზით. ამ ფაქტის გათვალისწინებით, გერმანულ-ქართული სკოლა-სემინარის (რომელიც პირველად ჩატარდა 2004 წელს და ტრადიციულად 2 წელიწადში ერთხელ იმართება) მთავარი ამოცანაა ახალგაზრდა მეცნიერებს მიეცეთ საშუალება უკეთ გაეცნონ ცენტრის სამეცნიერო ინფრასტრუქტურის ბაზაზე განხორციელებულ ფუნდამენტური და გამოყენებითი ხასიათის კვლევით პროექტებს, რაც ქართული სამეცნიერო პოტენციალის გაღრმავებას განაპირობებს.
| უკან |
