1-3 ივლისს ტექნოლოგიების, განათლებისა და განვითარების საერთაშორისო აკადემიის, IATED-ის მიწვევით ბსუ-ს ზუსტ მეცნიერებათა და განათლების ფაკულტეტის პედაგოგიკურ მეცნიერებათა დეპარტამენტის ასისტენტ პროფესორმა დიანა ახვლედიანმა და ნიკო ბერძენიშვილის ინსტიტუტის ფოლკლორის, დიალექტოლოგიისა და ემიგრანტული ლიტერატურის კვლევის განყოფილების მთავარმა მეცნიერ თანამშრომელმა ნარგიზ ახვლედიანმა მონაწილეობა მიიღეს ესპანეთში, ქალაქ პალმა დე მალიორკაში გამართულ მე-16 ყოველწლიური საერთაშორისო კონფერენციაში თემაზე: „განათლებისა და ახალი სასწავლო ტექნოლოგიები“. მომხსენებლებმა კონფერენციაზე წარადგინეს მოხსენება: „საქართველოს უმაღლესი და ზოგადსაგანმანათლებლო ინსტიტუციების თანამშრომლობის მიზნები და შედეგები ინტერდისციპლინარული სწავლების უახლესი მეთოდების ფონზე“.

ბათუმის შოთა რუსთაველის სახელმწიფო უნივერსიტეტი მეორე ეროვნულ კონფერენციას „ინკლუზიური განათლება საქართველოში - მიღწევები, გამოწვევები და პერსპექტივები - 2024“ მასპინძლობს. ორდღიანი კონფერენციის მიზანია ქართულ აკადემიურ სფეროს წარმოუდგინოს ინკლუზიურ განათლებასთან დაკავშირებული სამეცნიერო კვლევის შედეგები. კონფერენციაში ბათუმის შოთა რუსთაველის სახელობის სახელმწიფო უნივერსიტეტის, ივანე ჯავახიშვილის სახელობის თბილისის სახელმწიფო უნივერსიტეტის, აკაკი წერეთლის სახელმწიფო უნივერსიტეტისა და სამცხე-ჯავახეთის სახელმწიფო უნივერსიტეტის აკადემიურ პერსონალთან ერთად, საქართველოს განათლების, მეცნიერებისა და ახალგაზრდობის სამინისტროს, მასწავლებელთა პროფესიული განვითარების ეროვნული ცენტრის, პროფესიული უნარების სააგენტოსა და საქველმოქმედო ფონდის „საქართველოს კარიტასი“ წარმომადგენლებიც მონაწილეობენ.

გუდავაძე-პატარკაციშვილის ფონდის სტიპენდია 2023-2024 სასწავლო წლის გაზაფხულის სემესტრში ბსუ-ს ზუსტ მეცნიერებათა და განათლების ფაკულტეტის ზოგადი განათლების დაწყებითი საფეხურის მასწავლებლის მომზადების ინტეგრირებული საბაკალავრო-სამაგისტრო საგანმანათლებლო პროგრამის ათმა წარჩინებულმა სტუდენტმა მიიღო. ფონდის სტიპენდიას ერთი სემესტრის განმავლობაში შემდეგ სტუდენტები მიიღებენ: მარიკა ოთიაშვილი, ქეთევან მახაჭაძე გიორგი მოსიძე, ნანა ცინცაძე, თეონა ქარცივაძე, თიკა ბუცხრიკიძე, მარიკა შამილიშვილი ხატია ფაღავა, ემზარ ჭელიძე და მელანო ანანიძე. ბსუ სტუდენტებს ულოცავს გამარჯვებას და უსურვებს წარმატებებს.

ფიზიკის დეპარტამენტის ასისტენტ პროფესორის მირანდა ხაჯიშვილის ორგანიზებით 20.04.2024 ბსუს სსიპ თეიმურაზ ჯორბენაძის ქობულეთის III საჯარო სკოლის მოსწავლეები და კერძო სკოლა „ეურო 2000“ ის მოსწავლეები ეწვივნენ. ზუსტ მეცნიერებათა და განათლების ფაკულტეტის ფიზიკის დეპარტამენტის სრულმა პროფესორმა ნუგზარ ღომიძემ მოსწავლეებს გააცნო ბსუ-ს ფიზიკის ლაბორატორიის ინფრასტრუქტურა და ფიზიკის თანამედროვე პოპულარური საკითხები, ესაუბრა სკოლისა და უნივერსიტეტის თანამშრომლობის მნიშვნელოვან საკითხებზე. მოსწავლეები ჩაერთო Stem ექსპერიმენტებში, რომელშიც ჩართული იყო ფიზიკის სამაგისტრო პროგრამის მაგისტრანტები.

ბსუ-ს მონაწილეობით კონკურენტული ინოვაციის ფონდის (CIF) მეორე საგრანტო კონკურსის გამარჯვებული პროექტი „საინჟინრო საგანმანათლებლო პროგრამების ერთობლივი შემუშავება და განხორციელება დისტანციური ლაბორატორიების გამოყენებით“ განხორციელდება. პროექტი საქართველოს ტექნიკურმა უნივერსიტეტმა წარადგინა და მისი მიზანია საქართველოს წამყვან საინჟინრო უნივერსიტეტსა და ორ რეგიონულ უნივერსიტეტში საინჟინრო პროფილის კონკრეტული საგანმანათლებლო პროგრამების განვითარება. ასევე, ზოგადად უნივერსიტეტებში დისტანციური საინჟინრო სწავლებისთვის მეთოდური და ტექნოლოგიური საფუძვლების შექმნა.