ზუსტ მეცნიერებათა და განათლების ფაკულტეტის ფიზიკის დეპარტამენტის ასოცირებულმა პროფესორმა ზაურ გამიშიძემ ბათუმის №6 ფიზიკა-მათემატიკის საჯარო სკოლაში მოსწავლეებისთვის ლექცია წაიკითხა თემაზე: „ფიზიკა საზღვრების გარეშე“. ასოცირებული პროფესორი ზაურ გამიშიძე მოსწავლეებს ესაუბრა ნანოსამყაროში მიმდინარე მნიშვნელოვანი მოვლენების, ნანონაწილაკების სინთეზის მარტივი მეთოდების და მათ საფუძველზე მიღებული ნანომასალების მეცნიერებისა და ტექნოლოგიების სხვადასხვა სფეროში გამოყენების საკითხებზე. შეხვედრის ფარგლებში, მოსწავლეებმა წარმოადგინეს მოსწავლე გამომგონებელთა და მკვლევართა კონკურსზე „ლეონარდო და ვინჩი“ წარსადგენი პროექტი „ელექტროლიზის საშუალებით ნანონაწილაკების სინთეზი“.

ზუსტ მეცნიერებათა და განათლების ფაკულტეტზე არსებულმა ინოვაციათა ლაბორატორიამ ხელვაჩაურის #1 საჯარო სკოლის, ბათუმის #13 და და #22 საჯარო სკოლების მოსწავლეებსა და მათემატიკის პედაგოგებს უმასპინძლა. ბსუ-ს ინოვაციათა ლაბორატორიაში მოსწავლე ახალგაზრდები გაეცნენ საერთაშორისო საგანმანათლებლო რესურსის CK 12-ის გამოყენების შესაძლებლობებს. 3-საათიანი ტრენინგის ფარგლებში მოსწავლეებმა შეისწავლეს STEM-ის მიმართულებით ინოვაციური პროექტების დაგეგმვის, საგანმანათლებლო პროცესში სიმულაციების გამოყენების შესაძლებლობები.

8-12 აპრილს ბათუმის შოთა რუსთველის სახელმწიფო უნივერსიტეტის ზუსტ მეცნიერებათა და განათლების ფაკულტეტის ასოცირებული პროფესორი ნინო სვანიძე „ერაზმუს+“-ის გაცვლითი პროგრამის ფარგლებში აკადემიური მობილობით კროსნოს კარპატების სახელმწიფო კოლეჯში (პოლონეთი) იმყოფებოდა. ნინო სვანიძემ „სადაზღვევო მათემატიკაში“ მენეჯმენტის სპეციალობის სტუდენტებისათვის ლექციათა კურსი წაიკითხა.

საქართველოს ფრანგული ინსტიტუტი, საფრანგეთის საელჩო საქართველოში, პარი-საკლეს უნივერსიტეტი (Université Paris-Saclay), ირენ ჟოლიო-კიურის ფიზიკის ლაბორატორია - IJCLab, ბირთვული კვლევების ევროპული ორგანიზაცია - CERN და საქართველოს მეცნიერებათა ეროვნული აკადემია აცხადებენ კონკურსს ფიზიკაში ქართველი კანდიდატებისთვის. კონკურსში მონაწილეობის მიღება შეუძლიათ როგორც საშუალო სკოლის მოსწავლეებს, ასევე, უმაღლესი საგანმანათლებლო დაწესებულებების ბაკალავრიატისა და მაგისტრატურის საფეხურის სტუდენტებს. შერჩეული კანდიდატები საკუთარ ნამუშევრებს წარადგენენ კონფერენციაზე, რომელიც გაიმართება 2023 წლის 2 მაისს საქართველოს მეცნიერებათა ეროვნულ აკადემიაში.

„ერაზმუს+“-ის პროექტის „ინოვაციები კურიკულუმში სოციალური ჩართულობის მხარდასაჭერად" (Curriculum Innovation for Social Inclusion – CISI) ფარგლებში, მოკლევადიანი ტრენინგი ჩატარდა თემაზე: „აუტიზმის სპექტრის მქონე მოსწავლეებთან მუშაობა სკოლაში“. ტრენინგში საჯარო და კერძო სკოლების მასწავლებლები, სპეცმასწავლებლები და სსსმ მოსწავლეთა მშობლები მონაწილეობდნენ. ტრენინგის მიზნად ისახავდა მსმენელებისთვის აუტიზმის სპექტრის აშლილობების მიზეზების, სიმპტომების, სპეციფიკური სოციალურ-კომუნიკაციური უნარების განმავითარებელი და სწავლების სტრატეგიების გაცნობას. ტრენინგი ონლაინ ფორმატით განხორციელდა და 3 დღის განმავლობაში მიმდინარეობდა.