ახალი ამბები

ბათუმის შოთა რუსთაველის სახელმწიფო უნივერსიტეტის აკადემიური საბჭო ეხმაურება ქვეყანაში ბოლო პერიოდში მიმდინარე მოვლენებს და აცხადებს, რომ ბსუ ერთგულია მისიით გაცხადებული ღირებულებებისა და უნივერსიტეტების დიდი ქარტიის ფუნდამენტური პრინციპების. უნივერსიტეტი თავისი საქმიანობით არის საქართველოს ევროკავშირში ინტეგრაციის აქტიური ხელშემწყობი და მხარდამჭერი, ვინაიდან ვთვლით, რომ ევროპა ჩვენი ქვეყნის ისტორიული არჩევანი და წარმატებული მომავალია.

ბსუ უკვე მესამე წელია მაღალმთიან აჭარაში მცხოვრებ აბიტურიენტებს ერთიანი ეროვნული გამოცდებისთვის - მათემატიკაში, ინგლისურ ენაში, ქართულ ენასა და ლიტერატურაში უფასოდ ამზადებს. 1-ელ დეკემბერს უნივერსიტეტმა განაახლა აბიტურიენტთა მომზადების მოკლევადიანი მიზნობრივი საგანმანათლებლო პროგრამების განხორციელება შუახევისა და ხულოს მუნიციპალიტეტის მე-12 კლასის მოსწავლეებისთვის. ბსუ-ს რექტორის მოადგილე თამარ სირაძე მუნიციპალიტეტებში იმყოფებოდა, აბიტურიენტებს შეხვდა და ადგილზე გაეცნო პროგრამის მიმდინარეობას.

ბათუმის შოთა რუსთაველის სახელმწიფო უნივერსიტეტსა და სოფლის მეურნეობის სამეცნიერო კვლევით ცენტრს შორის თანამშრომლობის მემორანდუმი გაფორმდა. დოკუმენტს ხელი ბსუ-ს რექტორის მოვალეობის შემსრულებელმა მერაბ ხალვაშმა და სოფლის მეურნეობის სამეცნიერო-კვლევითი ცენტრის დირექტორმა, ლევან უჯმაჯურიძემ მოაწერეს. შეთანხმება თანამშრომლობის გაღრმავებას, აგრარული მიმართულებით ერთობლივი პროექტებისა და კვლევების განხორციელებას, კონფერენციების, სემინარების, ტრენინგების ჩატარებას და ასევე ცენტრის საცდელ-სადემონსტრაციო და ლაბორატორიულ ბაზებზე სტუდენტების სტაჟირებას ითვალისწინებს.

ბათუმის შოთა რუსთაველის სახელმწიფო უნივერსიტეტში პროფესიულ საგანმანათლებლო პროგრამებზე სასწავლო პროცესი დაიწყო. სტუდენტებს სწავლის დაწყება ბსუ-ს რექტორის მოადგილემ თამარ სირაძემ და პროფესიული პროგრამების მართვის და უწყვეტი განათლების ცენტრის დირექტორმა მადონა მიქელაძემ მიულოცეს. მათ ისაუბრეს პროფესიული განათლების მნიშვნელობასა და ბსუ-ს მიერ შეთავაზებულ სიახლეებსა და შესაძლებლობებზე, რომლებიც სტუდენტების კარიერულ განვითარებას ემსახურება. ასევე სიტყვით გამოვიდნენ ბათუმის რეფერალური ჰოსპიტალის სამედიცინო დირექტორი, ბსუ-ს პროფესიული საგანმანათლებლო პროგრამის „საექთნო განათლება" ხელმძღვანელი თამარ მხატვარი და ბათუმის რეფერალური ჰოსპიტალის მთავარი მედდა, ამავე პროგრამის ხელმძღვანელი ინგა კილტავა. ღონისძიებას დამსაქმებლები, სტუდენტები, პროფესორ-მასწავლებლები და კურსდამთავრებულები ესწრებოდნენ.

დღეს, რექტორის მოვალეობის შემსრულებელი მერაბ ხალვაში ღვაწლმოსილ მეცნიერებს შეხვდა, მადლობა გადაუხადა გაწეული შრომისა და მეცნიერებაში შეტანილი წვლილისათვის და პირადად მიულოცა მათ ეს მნიშვნელოვანი აღიარება. შეხვედრისას კიდევ ერთხელ აღნიშნა ნიკო ბერძენიშვილის ინსტიტუტის მეცნიერების დამსახურება და მათი როლი ქართული მეცნიერების განვითარებაში.